ᐸᐃᓐᓄᑕᖕ: ᐸᖕᓂᕐᑑᖅ “ᓄᓇ ᐸᖕᓂᓕᒃ”
ᖃᓪᓗᓈᑦᑕᖃᓚᐅᑦᑎᓐᓇᒍ, ᑎᓄᑦᔭᕐᕕᒃ ᐊᖏᕐᕋᕆᔭᐅᓚᐅᑉᐳ ᐃᓄᓐᓄᑦ ᐊᒻᒪᓗ ᓯᕗᓂᒥᓂᖏᓐᓄᑦ, ᑑᓕ ᐊᒻᒪᓗ ᑐᓃᑦ. ᓱᓕᔪᒥᓪᓕ, ᑎᓄᑦᔭᕐᕕᒃ ᐊᖏᕐᕋᕆᔭᐅᓯᒪᕗ ᐊᒥᓱᓄ ᐃᓄᓐᓄᑦ ᑕᐃᒪᓐᖓᓂ ᐃᓄᖃᕆᐊᓕᓚᐅᔅᓯᒪᒻᒪ ᐅᑭᐅᑦᑕᕐᑐᖅ.
Tᖃᓪᓗᓈᖅ ᔮᓐ ᑕᐃᕕᔅ ᐊᕐᕌᒍᖓᓂ 1585 ᓯᕗᓪᓕᑉᐹᒥ ᕿᓂᖅᑳᓚᐅᑦᑐ ᑕᒪᑐᒥᖓ. ᕿᓂᕆᐊᔅᓯᒪᓚᐅᑦᑐ ᐅᑭᐅᑦᑕᕐᑑᑉ ᐃᑭᕋᓴᔾᔪᐊᖓᓂ. 1838ᒥ, ᓯᑳᑦᑎ ᐊᕐᕕᓂᐊᑦᑎ ᐊᑎᖃᑦᑐ ᐅᐃᓕᐊᒻ ᐱᐊᓂ ᐊᒻᒪᓗ ᐃᑲᔪᑦᑎᖓ ᐃᓄᓗᐊᐱᒃ ᓇᓂᓯᓚᐅᑦᑑ ᑎᓄᑦᔭᕐᕕᐅᑉ ᐹᖓᓂ. ᑭᖑᓂᐊᓂ ᓯᑳᑦᑏᑦ ᐊᒻᒪᓗ ᐊᒥᐊᓕᑲᐃᑦ ᐊᕐᕕᓂᐊᑦᑏᑦ ᑕᒪᐅᓐᖓᓚᐅᑦᑐ.
ᐃᓄᐃᑦ ᐃᓅᓯᕆᔭᖏᑦ ᐊᓯᔾᔨᐸᓪᓕᐊᓕᓚᐅᑦᑐ ᑕᐃᑲᓐᖓᑦ. 1850 ᓄᓐᖑᖏᓐᓂᑦ, ᐃᓄᐃᑦ ᐊᒥᓱᑦ ᕿᒪᐃᓚᐅᑉᐳ ᓄᓇᓕᒋᔭᖏᓐᓂ ᐃᖅᑲᓇᐃᔭᕆᐊᑦᑐᑦᑐᑎ ᐊᕐᕕᓕᕆᕕᐅᔪᓄᑦ ᓄᕘᔮᔾᔪᓐᓂᑦ ᐊᒻᒪᓗ ᕿᑭᑦᑕᓂᑦ.
ᐃᓄᐃᑦ ᐅᓂᒃᑲᐅᓯᒋᔭᖏᓐᓂ, ᐊᖑᑎ ᐊᑎᓕᒻᒥᑦ ᐊᑕᒍᔪᖅ ᐊᑦᑏᓚᐅᑦᑐ ᓄᓇᓕᐅᔪᒥᑦ. ᐅᓪᓗᒥᓕ, ᐃᓕᓐᓂᐊᕕᔾᔪᐊᖅ ᐊᑦᑎᑦᑕᐅᓯᒪᔪ ᐃᖅᑲᐅᒪᒋᔭᐅᖁᓪᓗᒍ ᐊᑎᖓ.
1921ᒥ, ᕼᐊᑦᓴᓐ ᐸᐃ ᑲᒻᐸᓂᒃᑯᑦ ᓂᐅᕕᕐᕕᓕᐅᓚᐅᑉᐳ ᐸᖕᓂᕐᑑᒥ ᑲᔪᖏᕐᓰᓪᓗᑎᓪᓗ ᐃᓄᓐᓂᑦ. ᒪᕐᕉ ᐊᕐᕌᒎᒃ ᐊᓂᒍᓐᖓᑎ, 1923ᒥ, ᕈᐃᐅ ᑲᓇᐃᑎᐊᓐ ᐸᓖᓯᒃᑯ ᐸᓖᓯᖃᕐᕕᓕᐅᓚᐅᑉᐳ ᓯᕗᓪᓕᑉᐹᒥᑦ. 1929ᒥ, ᐃᔾᔪᓇᐃᑦᑐ ᓘᑲᓯᐅᑉ ᐋᓂᐊᕐᕕᖓ ᓴᓇᔭᐅᓚᐅᑦᑐ.
ᐊᒥᓲᓂᖏ ᐃᓄᐃᑦ ᐸᖕᓂᕐᑑᒥ ᖃᑦᑏᓐᓇᑯᓘᓚᐅᑦᑐ 1960ᖏᓐᓂᑦ. 1962ᒥ, ᐊᒥᓱ ᐃᓄᐃᑦ ᑎᓄᑦᔭᕐᕕᒻᒥᐅᑕᐃᑦ ᓅᓚᐅᑉᐳ ᐸᖕᓂᕐᑑᒧ ᕿᒻᒦᑦ ᐋᓐᓂᐊᓂᕐᒧ ᑐᖁᕋᓚᐅᑦᑎᓪᓗᒋᑦ. ᑕᕝᕙᓂᔅᓴᐃᓐᓇ ᐊᕐᕌᒍᖓᓂ, ᒐᕙᒪᑐᖃᒃᑯᑦ ᐊᓪᓚᕐᕕᑦᑖᓚᐅᑦᑐ ᓄᓇᓕᐅᔪᒥᑦ.
1973ᒥ, ᐸᖕᓂᕐᑑᖅ ᐊᐅᓚᑦᑎᔪᓐᓇᓕᓚᐅᑦᑐ ᓇᒻᒥᓂᖅ ᓄᓇᓕᐅᔪᒧ ᒐᕙᒪᓕᕆᓂᒻᒥᑦ. ᐅᓪᓗᒥ, ᐸᖕᓂᕐᑑᖅ ᓄᓇᓕᐅᕗᖅ ᖃᐅᔨᒪᔭᐅᒻᒪᕆᓕᑦᑐᓂ ᓯᓚᔾᔪᐊᒥᐅᓄᑦ ᓴᓇᓐᖑᐊᒐᖏᓐᓄᑦ, ᓄᕕᔅᓴᒐᖏᓐᓄᑦ ᐊᒻᒪᓗ ᑎᑎᑦᑐᒐᖏᓐᓄᑦ ᐊᒻᒪᓗᑦᑕᐅ ᑲᔾᔮᓇᓐᓂᖓᓄᑦ ᐅᐸᒐᔅᓴᐅᓂᖓᓄᓪᓗ ᐊᐅᔪᐃᑦᑐᖅ ᒥᕐᖑᐃᓯᕐᕕᖓᓄᑦ.
ᐸᖕᓂᕐᑑᖅ ᐱᖓᔪᒋᔭᐅᕗᖅ ᓄᓇᕗᑦ ᓄᓇᓕᒋᔭᖏᓐᓂᑦ ᐃᖃᓗᓕᕆᕕᖃᑦᑐᓂ ᐃᖃᓗᒐᓱᑉᐸᑦᑐᑎ ᖃᓕᕋᓕᒐᓱᑉᐸᑦᑐᑎᓪᓗ. ᑕᐃᒪᐃᒻᒪᑦ, ᐸᖕᓂᕐᑑᖅ ᓯᕗᓪᓕᑉᐹᖑᓪᓗᓂ ᓄᓇᕗᑦᒥ ᐱᔪᓐᓇᓚᐅᑦᑐ ᑮᓇᐅᔭᑦᑐᕈᑎᔅᓴᓂ ᓴᓇᓂᐊᓪᓗᑎ ᑐᓚᑦᑕᕐᕕᔅᓴᐅᓂᐊᑦᑐᒥ.